{idkey=5925b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3672-andin-bikker-pdr-hinder-verordening-no-ta-wordo-aplica-na-compania-na-noord-cu-ta-causa-molester%3FItemid%3D101][title=Andin+Bikker+%28PDR%29%3A+Hinder+Verordening+no+ta+wordo+aplica+na+compania+na+Noord+cu+ta+causa+molester%21][desc=Andin+Bikker+ta+puntra+pakico+nos+tin+gobierno.%26amp%3Bnbsp%3BPartido+Democracia+Real+a+tene+su+rueda+semanal+di+prensa+diamars.+Su+lider+Andin+Bikker+a+bolbe+referi+na+gobierno+cu+no+ta+ehecutando+leynan+vigente%2C+siendo+cu%26amp%3Bnbsp%3B+esaki+ta+un+di+su+tareanan+principal%3A+%E2%80%9Creforza+nos+leynan%2C+si+no+nan+ta+bira+ticketnan+di+papel%E2%80%9D.PDR+a+bolbe+a+tuma+nota+den+medionan+di+comunicacion+cu+habitantenan+di+un+vecindario+na+Noord%2C+atrobe+ta+bati+alarma+cu+gobierno+no+ta+aplica+ley+pa+loke+ta+trata+e+hinder+veror]}
Andin Bikker ta puntra pakico nos tin gobierno. 

Partido Democracia Real a tene su rueda semanal di prensa diamars. Su lider Andin Bikker a bolbe referi na gobierno cu no ta ehecutando leynan vigente, siendo cu  esaki ta un di su tareanan principal: “reforza nos leynan, si no nan ta bira ticketnan di papel”.

PDR a bolbe a tuma nota den medionan di comunicacion cu habitantenan di un vecindario na Noord, atrobe ta bati alarma cu gobierno no ta aplica ley pa loke ta trata e hinder verordening, kiermen, ley pa evita molester.

Bikker a splica cu tin un empresa den un bario habita, cu a dicidi di traha cement y bloki, y ta molestiando e habitantenan. “Tin personanan cu a bin cerca nos na Fundacion Pro - Husticia, siman pasa, pasobra nan yiunan mester biba cera paden, nan mester tin bentana cera, debi cu e molester di stof ta increible. Nos tin informacion cu pa colmo, e compania aki no tin hinder vergunning, y ni un dia so, el a aplica pa esaki. Esey ta un di e ehemplonan mas cu bo ta wak cu gobierno no ta aplicando leynan, of ta aplike pa e homber chikito, pero ora ta trata di cierto companianan, diripiente leynan di Aruba no ta existi.

Esey nos ta wak ora ta trata di e proyecto di Urirama, diripiente R.O.P no ta existi, entre otro casonan cu hasta a bay Corte.

“Kico ta pasando cu e homber humilde ta cana bay di cashi pa muraya, pa e haya su paz y trankilidad den su cas, y tin cierto hendenan cu, aparentemente, si nan ta hopi cerca di gobierno ley no ta conta pa nan.

Anto, pa loke ta trata e hinder verordening, den e caso aki, no solamente ta regarda señor Minister Sevinger, pero segun mi, mi tin cu doble check esey, e minister di husticia tambe, anto esey ta algo hopi preocupante”.

PDR ta custumbra caba cu Minister Sevinger a perde gevoel, e no ta worry cu nada mas, y e ta bon sinta riba google wak unda falta un pida tereno cu e no por a haya, cu e no a parti te ainda. Bikker a bisa cu hasta riba e pida baranca cu tin den e beach di Daimari, por a ripara cu tin un par di estaca cora eynan, pasobra ya caba midi e ta pa amigo nan serca.

En todo caso, PDR a tuma hopi na serio cu ni Minister encarga cu infrastructura, cu no ta worry cu nada mas, pa menos cu esey tin ministernan cu a tuma nan retiro. Casi cada pasa un dia e minister ta haya sentencia contra dje, cu ta motibo pa e retira boluntariamente, segun e lider di PDR, y e ta splica tambe cu tin leynan cu ta regarda otro ministerionan cu tampoco no ta wordo reinforza.

“E ora ey bo ta puntra bo mes pakico bo tin gobierno anto? Si un di e tareanan principal di un gobierno ta reinforza leynan vigente, anto si e propio gobierno ta bira wak otro banda ora ta trata, aparentemente, otro companianan, anto nos ta bisa e ora ey ‘no, e compania akinan, den bario di Noord, cu habitantenan ta kehando riba dje ta con e ta hustifica cu e ta ocasionando e molester aki den un bario habita, y cu aparentemente e no tin vergunning pa cu esaki, no ta aceptable, y nos ta urgi gobierno a cuminza aplica leynan vigente, y no laga cada bez ciudadanonan wordo forza pa bay Corte, pa gasta placa pa haya husticia. Pakico bo ta paga belasting anto? Nos ta paga belasting pa gobierno ehecuta leynan pero aworaki ta resulta cu nos ta paga impuesto fuera di haci gastonan legal pa nos derecho. “Esey ta mundo riba su cabes”! Segun Andin Bikker.

Expresionnan haci den e articulo aki no necesariamente ta refleha opinion di ArenaPoliti.co