{idkey=1618b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3775-ministerio-di-turismo-sindicato-di-polis-a-reuni-cu-minister-otmar-oduber%3FItemid%3D101][title=Ministerio+di+Turismo%3A+Sindicato++di+Polis+a++reuni+cu+Minister+Otmar+Oduber][desc=Caminda+ta+traha+hunto+tin+progreso.%26amp%3Bnbsp%3BORANJESTAD+%28AAN%29+Minister+di+Turismo%2C+Transporte%2C+Sector+Primario+y+Cultura+aunke+cu+ta+den+su+vakantie+ta+probecha+asina+cu+haya+un+momento+liber+pa+atende+algun+puntonan+di+preocupacion+cu+tin+y+asina+mira+unda+cu+lo+por+aporta+di+un+manera+positivo+mirando+cu+nos+tur+ta+un+Aruba+nos+ta.+Presidente+di+Sindicato+di+Polis+S.P.A+Juan+Gomes+hunto+cu+e+mandatario+a+sinta+na+mesa+ya+discuti+riba+diferente+puntonan%2C+principalmente+e+puntonan+cu+e+mandatario+t]}
Caminda ta traha hunto tin progreso. 

ORANJESTAD (AAN) Minister di Turismo, Transporte, Sector Primario y Cultura aunke cu ta den su vakantie ta probecha asina cu haya un momento liber pa atende algun puntonan di preocupacion cu tin y asina mira unda cu lo por aporta di un manera positivo mirando cu nos tur ta un Aruba nos ta. Presidente di Sindicato di Polis S.P.A Juan Gomes hunto cu e mandatario a sinta na mesa ya discuti riba diferente puntonan, principalmente e puntonan cu e mandatario ta desea pa tin atencion na dje cu ta riba e aspecto di turismo.

E realidad ta cu siguridad ta algo hopi importante y ta pesey mes e mandatario ta desea un participacion mas activo. Tambe oficina di turismo a mustra e echo cu ATA ta contribui tur aña cu mas di 750 mil florin cu a keda hopi bon uza den Aruba Hotel Securtity Foundation (AHSF) cu a cumpra diferente materialnan necesario. Sinembargo no ta trata di cumpra material so, pero tambe a haci uzo di e placa riba e calidad di servicio  cu ta keda brinda di parti di cuerpo policial di cual cu e rol por ta hopi mas activo.

Na diferente ocasion tabatin diferente situacionnan menos agradabel cu a pasa, manera entre otro  e tiroteo cu a tuma luga casi un aña y mey pasa unda cu un taxista a haya un bala bao di su wowo  den un zona unda cu mas e turistanan ta frecuenta. Ya caba for di e tempo ey ATA a mustra cu tin fondonan disponibel pa cuerpo policial na momento cu presenta un bon plan su tras y cu lo bay beneficia e turismo di Aruba. E responsabilidad di tanto ATA y Minister di Turismo ta carga pa ley  ta un responsabilidad pa turismo. Siguridad ta hopi importante, pero mas importante ta e parti di prevencion.

E mandatario a vocifera seriamente cu pa su persona no ta importante gara un ladron, pero pa turismo ta importante cu e persona cu intencion malo  no  eherce algo criminal pa asina nunca e no bira un ladron. Loke cu nos tur riba e pida baranca aki mester realisa ta cu na momento cu un daño wordo haci unda cu un atraco, robo tuma luga automaticamente e propaganda ta bira hopi malo y negativo pa pais Aruba. E mandatario ta indica cu na momento cu gara e ladron ey un dia despues of un siman despues ta demostra cu husticia ta prevalece, pero e no ta yuda e imagen di nos turismo cu a wordo atacha instantaneamente. Minister Otmar Oduber ta contento di por a reuni cu sindicato S.P.A den bon ambiente y a papia riba diferente puntonan cu por coopera cu cuerpo policial.

Di banda di sindicato S.P.A nan tambe ta desea un cooperacion mas estrecho entre departamentonan pa yuda. Presidente di sindicato S.P.A Juan Gomes ta hopi contento cu e reunion a tuma luga mirando cu den e area turistico specificamente den ultimo tempo tin hopi incidentenan tumando luga. Recientemente algun turista a bolbe keda ataca un biaha mas y esaki ta situacionnan cu nos mester por preveni. S.P.A di su banda ta kere cu tipo di reunionnan asina ta na su luga pa tin un direccion pa cana y S.P.A t'ey pa yuda, asina e presidente a menciona. Ta importante pa nos tur riba e pida baranca aki tene e unico pilar economico, cu ta turismo, pa mantene esaki solido.  

Sinembargo tin algun punto di preocupacion den cuerpo policial, ta keda falta di material y na unda cu tin un posibilidad pa duna un man na cuerpo policial lo tuma esaki seriamente. Presidente di S.P.A ta comparti cu Minister Otmar Oduber ta desea mas atencion riba e aspecto y areanan turistico na Aruba. Nos no ta yega niun caminda si nos sinta warda wak kico tur ta sosodiendo. Mester actua pa mehora e situacion esaki cu lo trece su efecto cu ne. Mester ta cla cu e efectonan den turismo tin consecuencianan pa tur cu ta biba riba e pida baranca aki. Actualmente S.P.A lo cana su caminda pa traspasa e informacion necesario pa di e forma aki mira e situacion mas cu seriedad. Un otro punto cu sigur ta importante segun e presidente di S.P.A. ta cu mester por tin un 'samenwerking' entre tur departamentonan na bienestar di nos isla. Sr. Gomes ta finalisa bisando: "Caminda ta traha hunto tin progreso"

Expresionnan haci den e articulo aki no necesariamente ta refleha opinion di ArenaPoliti.co