{idkey=6771b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4116-ministerio-di-turismo-minister-oduber-a-acorda-y-confirma-un-suma-di-5-miyon-florin-pa-siguridad%3FItemid%3D101][title=Ministerio+di+Turismo%3A+Minister+Oduber+a+acorda+y+confirma+un+suma+di+5+miyon+florin+pa+siguridad][desc=Cumpliendo+tambe+asina+cu+mocion+di+parlamento.%26amp%3Bnbsp%3BActualmente+tin+cantidad+di+discusion+tumando+luga+di+fondonan+di+Aruba+Tourism+Authority+%28ATA%29+cu+ta+disponibel+pa+por+duna+un+sosten+na+actividadnan+di+prevencion+y+tambe+criminalidad+di+Aruba.+Minister+encarga+cu+Turismo+Otmar+Oduber+a+tene+un+conferencia+di+prensa+pa+trece+claridad+den+e+discusionnan.%E2%80%9CPa+un+tempo+caba+a+mira+un+necesidad+pa+pone+fondonnan+disponibel+pa+criminalidad.+Mi+a+bisa+esaki+na+diferente+ocasion%2C+cu+mi+no+ta+kere+]}
Cumpliendo tambe asina cu mocion di parlamento. 

Actualmente tin cantidad di discusion tumando luga di fondonan di Aruba Tourism Authority (ATA) cu ta disponibel pa por duna un sosten na actividadnan di prevencion y tambe criminalidad di Aruba. Minister encarga cu Turismo Otmar Oduber a tene un conferencia di prensa pa trece claridad den e discusionnan.

“Pa un tempo caba a mira un necesidad pa pone fondonnan disponibel pa criminalidad. Mi a bisa esaki na diferente ocasion, cu mi no ta kere cu e ta responsabilidad di solamente Ministerio di Husticia. Esey ta e motibo cu diferente biaha nos a mustra cu nos kier yuda y a ofrece pa duna un man den henter e proceso aki. Minister di Husticia mes na diferente ocasion a bisa cu e mester fondo adicional pa criminalidad”.

Entrega presupuesto ATA na Parlamento
Ayera a entrega e presupuesto di ATA pa loke ta 2017 y a base di e mocion cu a haya di Parlamento e suma di 750 mil florin cu tabatin originalmente den e presupuesto a wordo aumenta na 5 miyon florin. Kiermen den e presupuesto Parlamento lo tin e suma cu ATA ta contribui na AH&SF di 5 miyon florin, si esaki pasa Parlamento naturalmente. “E ta carga mi autorisacion caba, e mester drumi 10 dia na Parlamento y si tur cos bay bon na januari 2017 e Ministerio di Husticia lo por conta cu e suma adicional aki pa siguridad riba nos isla. Mi ta kere cu di e forma ey, responsabel, conforme e leynan di ATA, ta yuda contribui na e discusion di siguridad na Aruba.

Siguridad y turismo
Un di e puntonan di mas importante cu un turista ta bishita nos isla ta, e hecho cu nos ta wordo cualifica como un isla cu un grado di siguridad hopi halto. A tuma nota cu recientemente mas y mas e punto di criminalidad ta bin dilanti di parti e bishitantenan. Nos sa y nos a splica cu pa turismo e ta importante cu ora un acto di criminalidad tuma luga, cu por resolve esaki y gara esunnan cu a ocasiona esaki. Sinembargo, unabes un crimen tuma luga, pa turismo specificamente esaki ya caba ta un stap mucho laat.

Cu medionan social di awendia y prensa, e forma cu informacion ta sali ta hacie hopi dificil pa turismo cu ta asina sensitivo pa actonan cu tuma luga di criminalidad. Ta den e rosea aki mes cu a mustra riba e hecho cu fondo di turismo ta pone fondo disponibel. Na momento cu ATA Sui Generis a bira realidad, a cera un convenio cu nos lo carga e responsabilidad ey como ATA pa percura pa e fondonan aki ta disponibel, Minister Oduber a splica.

ATA tincu responde na Parlamento p’e gastonan y e Minister di Turismo ta personalmente responsabel pa e sumanan aki. Esaki ta un diferencia hopi grandi cu anterior, unda cu ATA no mester a responsabilisa na niun hende e placa aki, unda e ta bay of kico ta wordo haci cu ne. Sinembargo ora cu ATA a tuma e responsabilidad aki over na 2011, ta stipula cu nan mester responsabilisa esaki den cuentanan anual y na Parlamento di Aruba cu ta esun cu ta duna su bendicion pa presupuesto di ATA.

Responsabilidad cu AH&SF
ATA tin un responsabilidad cu Aruba Hospitality & Security Foundation (AH&SF) cu ta unda nan ta deposita e placa. Pa trece aclaracion riba declaracionnan haci recien, ATA no ta exigi planannan di siguridad di cuerpo policial pa por duna fondo. ATA su convencio ta cu AH&SF y pues ta logico cu nan mester sa na kico e fondonan aki ta wordo uza. Tur aña AH&SF ta entrega presupuesto di e aña cu ta bin y tambe nan ta entrega e cuenta anual pa nan sa exactamente na kico e sumanan ta bay pa loke ta trata e placa cu ta wordo inverti den AH&SF. “ATA no tin un link directo cu Cuerpo Policial di Aruba. ATA a wordo acerca door di AH&SF cu un peticion cu a drenta di Cuerpo Policial di Aruba. Un peticion cu a analisa y a discuti riba dje y a dicidi despues cu a haya presentacion, cu ta contribui cu ne pasobra ta kere cu e ta na bienestar di industria di turismo y siguridad en general di Aruba. Ora cu contribui di e forma aki, e ta duna e Minister di Husticia espacio den su presupuesto pa e por dedica na otro areanan cu ta cay bou di su responsabilidad pa loke ta siguridad”.

Minister Oduber a enfatisa cu no tin problema pa fondonan pa criminalidad sali for di ATA, semper y cuanto e ta conforme e ley di ATA. E fondonan di ATA no por bay pa uzo cu no tin di haber directamente cu turismo di Aruba. Siguridad di nos isla ta forma parti di instrumentonan cu ta uza pa atrae un hende na Aruba. Den e cuadro ey ta mira cu e destinacion di e placa cu ATA ta duna ta pa percura cu e areanan aki (Waf, centro di ciudad, area hotelero, San Nicolas, Baby Beach etc.) por wordo hustifica a base di e ley cu ta goberna ATA.

Expresionnan haci den e articulo aki no necesariamente ta refleha opinion di ArenaPoliti.co