{idkey=7709b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3786-gabinete-me-ii-poblacion-a-brasa-henter-e-concepto-di-un-miho-calidad-di-bida%3FItemid%3D101][title=Gabinete+ME+II%3A+Poblacion+a+brasa+henter+e+concepto+di+un+miho+calidad+di+bida][desc=Pa+medio+di+mehoracion+di+espacionan+publico+y+den+bario.%26amp%3Bnbsp%3BORANJESTAD+%E2%80%93+Minister+President+Mike+Eman+ta+hopi+contento+di+por+mira+e+cantidad+di+hoben+y+hende+grandi+cu+ta+haci+uso+di+Linear+Park+y+e+ekiponan+di+ehercicio+cu+a+keda+instala.+Recientemente+e+mandatario+hunto+cu+Minister+di+Infrastructura+Benny+Sevinger+a+haya+invitacion+di+Caribbean+Taekwondo+Institute+pa+haya+un+demostracion+di+con+nan+ta+entrena+na+e+parke+y+ta+haci+uso+di+e+ekiponan+den+nan+rutina.%26amp%3Bnbsp%3BPa+Gabinete+Mike+Em]}
Pa medio di mehoracion di espacionan publico y den bario. 

ORANJESTAD – Minister President Mike Eman ta hopi contento di por mira e cantidad di hoben y hende grandi cu ta haci uso di Linear Park y e ekiponan di ehercicio cu a keda instala. Recientemente e mandatario hunto cu Minister di Infrastructura Benny Sevinger a haya invitacion di Caribbean Taekwondo Institute pa haya un demostracion di con nan ta entrena na e parke y ta haci uso di e ekiponan den nan rutina. 

Pa Gabinete Mike Eman I y II, Linear Park ta realisacion di un idea cu esaki ta e tipo di facilidad cu Aruba tin mester y ta bay tin mester den contexto di e vision pa crea un miho calidad di bida pa nos hendenan. “Nos a pensa cu pa añanan largo e enfoke tabata hopi riba e parti comercial y di hotel, pero e aspecto di espacionan publico manera parke y plasanan no a haya e atencion cu e tabata merece,” asina Premier Eman a comenta. 

Ta pesey su gobierno a bin cu un plan caminda ta acopla tur e aspectonan tanto di recreacion y deporte y asina, pa medio di proyectonan manera Linear Park y parkenan deportivo den bario, como tambe iluminacion den bario, ta logrando cada dia mas e obhetivo. Ta purba di fomenta e interaccion social, contacto cu nos bisiñanan y otro hendenan di bario; no solamente dor di recreacion, pero tambe cu Servicionan Publico manera edificio di MFA cu ta brinda un ambiente mas positivo. 

“No tin nada mas democratico cu espacio publico pasobra rico y pober por disfruta di dje. No ta manera un Disney World cu bo mester tin un entrada pa bo por bay,” asina Prome Minister Eman ta opina. Hustamente esey ta loke su gabinete kier brinda pueblo di Aruba. “Ta un satisfaccion hopi grandi pa mira con poblacion a brasa henter e concepto di e vision di un miho calidad di bida,” Premier Eman a bisa aserca.

E mashinnan instala riba diferente punto di Linear Park for di Brandweer te na Plasa Wilhelmina ta traha a base di bo mesun peso di curpa y tin un variedad di movecion cu ta comproba di ta beneficioso pa condicion. Ora a scoge nan a tene cuenta cu no ta necesariamente pa deportistanan grandi, pero si pa e ciudadano cu kier haci un poco di actividad fisico y expande ehercicionan pa otro partinan di curpa.

Den realidad, tanto atleta como tur otro persona ta haciendo uso tur dia y ora  di e mashinnan aki. Gruponan deportivo manera Caribbean Taekwondo Institute y tur otro na Aruba ta invita pa bin y disfruta di Linear Park y su facilidadnan nobo.

Expresionnan haci den e articulo aki no necesariamente ta refleha opinion di ArenaPoliti.co