{idkey=3986b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4004-gabinete-me-ii-cu-firma-di-traspaso-di-tur-propiedad-di-valero-pa-pais-aruba-ta-despidiendo-di-un-gran-amigo%3FItemid%3D101][title=Gabinete+ME+II%3A+Cu+firma+di+traspaso+di+tur+propiedad+di+Valero+pa+pais+Aruba+ta+despidiendo+di+un+gran+amigo][desc=ORANJESTAD+%E2%80%93+Valero+Energy+Corporation+a+cuminsa+opera+refineria+di+Aruba+na+2004%2C+tumando+over+operacion+di+Coastal+Petroleum+Corporation%2C+cu+tabata+do%C3%B1o+di+e+refineria+na+Aruba.+For+di+e+tempo+ey%2C+Valero+a+demostra+su+mes+como+un+compania+cu+tin+un+bon+sentido+di+%E2%80%98corporate+citizenship%E2%80%99.+Durante+temponan+dificil+internacionalmente%2C+economia+a+stagna+y+gobierno+di+e+tempo+ey+a+haci%E2%80%99e+sumamente+dificil+pa+por+a+haci+negoshi+na+Aruba+den+temponan+economicamente+fragil.+Asina+mes+Valero+a]}
ORANJESTAD – Valero Energy Corporation a cuminsa opera refineria di Aruba na 2004, tumando over operacion di Coastal Petroleum Corporation, cu tabata doño di e refineria na Aruba. For di e tempo ey, Valero a demostra su mes como un compania cu tin un bon sentido di ‘corporate citizenship’. Durante temponan dificil internacionalmente, economia a stagna y gobierno di e tempo ey a haci’e sumamente dificil pa por a haci negoshi na Aruba den temponan economicamente fragil. Asina mes Valero a keda mantene e refineria ora cu a stop cu produccion. Un parti importante di e empleadonan a keda riba payroll pa yuda den mantencion di e refineria pendiente di un solucion, sea reapertura, bende of desmantelacion.

Cu gobernacion nobo, e posibilidad a habri pa por purba reanuda operacion na Aruba, pero esaki a keda un reto pa Valero cu un bes mas no tabata tin acceso na crudo Venezolano. Un bes mas Valero a keda cu empleadonan riba su payroll pendiente kico por haci, aunke cu nan no tabata obliga pa esaki.

Siman pasa, pais Aruba y Valero Energy Corporation a firma un acuerdo caminda e multinacional ta traspasa tur propiedad pa Aruba. Na su turno Aruba ta verhuur e propiedadnan aki na e operador nobo, CITGO. Pa prome biaha den su 93 aña di historia di e refineria na Aruba, e compleho petrolero ta bira propiedad di pais Aruba. Na e ocasion ey, Prome Minister Mike Eman a expresa su aprecio pa e manera cu Valero a sa di haci negoshi na Aruba y a haci esaki como un bon partner. “Mi kier expresa gradicimento di Gobierno y ciudadanonan di Aruba pa e partnership cu Valero a demostra na Aruba den transcurso di ultimo añanan. Tabatin hopi momento cu Valero mester a scoge entre e interes, meramente, corporativo of interes di empleadonan.”

Cu e traspaso a keda oficialisa siman pasa entre Aruba y Valero, pendiente di aprobacion di Parlamento, Valero su permanencia na Aruba a yega esencialmente na su final.

Prome Minster a splica cu el a experencia den e añanan dificil nan ey cu ora e refineria tabata cera, e payroll tabata costa Valero hopi miyon di dollar. E tempo ey a haci apelacion na e CEO di e tempo ey Bill Klessey: “No un pero varios biaha, el a prolonga e payroll di e empleadonan di Valero. Hopi kisas lo no sa esaki, pasobra e tipo di combersacionnan aki ta tuma luga tras di porta cera.” Pa un compania, particularmente di a statura aki, su responsabilidad ta pa cu su shareholdernan haci ganashi. Prome Minister a sigui splica cu “e ta un decision grandi y dificil pa haci escogencianan cu no necesariamente ta na beneficio di e accionistanan, pero na interes di cierto balornan cu nan tin como ciudadano di e mundo aki.” Segun Eman Valero a demostra como un gran compania e sentido di responsabilidad pa cual el a gradici su CEO actual, sr. Martin Parrish, masha hopi pa esaki.

Prome Minster a recorda cu na momento cu tabata den negociacion pa e facilidadnan di e refineria por wordo traspasa pa Aruba y huur esaki cu un compania nobo CITGO, sr. Martin a duna hopi bon conseho riba e operador nobo CITGO y a mustra cu e ta un compania cu hopi experiencia y conocemento den operacion di refineria. Sr. Parrish a traha den pasado pa e multinacional CITGO cu tin su cede oficial na Houston, Texsas y tin bon conocemento di e multinacional.

“Cu e apoyo y sentido di compromiso cu Valero a demostra na Aruba, ta e motibo cu awe esaki ta duna nos sentimento mixto cu nos ta despidiendo di un gran amigo, pero nos sa cu loke nos a establece hunto ta haci cu nos por topa otro atrobe na algun momento den futuro, pasobra awo Aruba tambe ta doño di un refineria. Nos ta un partner como doño di un refineria.”

Expresionnan haci den e articulo aki no necesariamente ta refleha opinion di ArenaPoliti.co