{idkey=9663b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F405-booshi-wever-upp-polarisacion-politico-na-aruba-ta-motibo-pa-frustracion-y-falta-di-interes-cerca-e-pueblo-y-intervencion-door-di-hulanda%3FItemid%3D101][title=Booshi+Wever+%28UPP%29%3A+Polarisacion+politico+na+Aruba+ta+motibo+pa+frustracion+y+falta+di+interes+cerca+e+Pueblo%2C+y+intervencion+door+di+Hulanda%3F][desc=E+forma+pa+conduci+politica+den+un+pais+ta+wordo+determina+di+un+banda+door+di+e+poder+di+e+partidonan+politico+di+e+pais.+Na+Merca+tin+dos+partido+politico+cu+ta+yega+den+gobernacion+di+un+forma+ciclico.+Un+tempo+ta+e+partido+republicano+ta+na+poder%2C+pa+despues+wordo+destitui+y+cambia+pa+e+democratanan.+Den+otro+pais+e+poder+ta+den+un+man+%28dictadura%29+manera+na+Cuba%2C+pero+den+mayoria+di+paisnan+democratico+ta+existi+mas+cu+dos+partido+politico+na+unda+mester+forma+un+gobierno+di+coalicion.+E+ot]}E forma pa conduci politica den un pais ta wordo determina di un banda door di e poder di e partidonan politico di e pais. Na Merca tin dos partido politico cu ta yega den gobernacion di un forma ciclico. Un tempo ta e partido republicano ta na poder, pa despues wordo destitui y cambia pa e democratanan. Den otro pais e poder ta den un man (dictadura) manera na Cuba, pero den mayoria di paisnan democratico ta existi mas cu dos partido politico na unda mester forma un gobierno di coalicion.

E otro forma pa conduci un pais tambe ta wordo determina con e partidonan politico ta profila nan mes y kiko ta nan base pa eherce gobernacion: social-democrata, cristian-democrata, (neo-) liberal, partidonan basa riba e principio cristian. Ultimo tempo sinembargo mundo politico mundial ta wak cu asombro y miedo un subida exponencial di extremistanan di derecha cu abiertamente ta cuestiona cualkier forma di gobernacion y ta induci na intolerancia, subordinacion di e reglanan democratico y finalmente confrontacionnan sangriento.

Spectrum politico cu ta delinea e diferente filosofianan politico


E monarcho frances Louis XV a yega di declara e frase famoso: “Après moi le déluge”. Por interpreta e declaracion aki di dos manera: ami ta e baas y ningun hende por touch me, pero tambe por ta cu e rey a ripara e inquietud cerca e pueblo, pasobra 15 aña despues e revolucion frances a tumba e reinado di su yiu y a desemboca den un periode creative, pero cu a costa bida di hopi hende. Historia atrobe ta yen di ehempel di cambio di pensamentonan politico cu a surgi a base di principalmente un incertidumbre economico (pobresa) acompaña pa un arogancia di poder.

E situacion geopolitico actual no ta diferencia mucho di loke historia a indica nos den pasado. Un incremento substancial di e incertidumbre economico na unda e clase media ta perdiendo tereno, e rico ta bira mas rico y e pober mas pober ainda. Economistanan renombra manera Thomas Piketty na Francia ta hala basta atencion cu nan advertencia pa cu e situacion economico mundial actual y ta pone nos corda riba un Karl Marx cu den pasado tambe a denuncia e inigualdad economico cu den su concepto lo por hiba na desasternan politico. Su advertencia no a wordo tuma na serio y nos a conoce e prome y segunda guera mundial.

Y mescos cu den pasado un hende of grupo mester haña e culpa, y den nos caso awendia ta e inmigracion di personanan di otro cultura, religion y fysico, Hitler a culpa e Hudiunan y Wilders e Marocanonan.

E incertidumbre economico tambe tabatin como resultado un division grandi entre e diferente partidonan politico na unda polarisacion politico, interes partidista y loyalidad na capital (e riconan di nos sociedad) a bin na prome lugar, y cu a resulta cu formacion di gobierno di cualicion cada bes a bira mas problematico y cu nan no ta wanta full e cuatro aña di gobernacion (Balkenende, Belgica) tampoco.

E situacion politico actual na Aruba no ta diferencia mucho di loke ta sosodiendo mundialmente. Nos economia y finanzas ta na peliger. Medida mester wordo tuma, y no tin un idea comun con pa sobrepasa e periodo dificil aki, pasobra nos partidonan politico ta empeña pa keda persisti den defende nan interes partidista en bes di enfoca riba e responsabildad sagrado di conhuntamente trata di mehora e situacion financiero di nos pais.

Diariamente nos ta haña un avalancha di propaganda politico. E partido na mando ta sigui cu e afan pa influencia e opinion publico cu promesanan di grandesa, y e partidonan den oposicion di nan banda no ta perde un chens pa mustra con deficiente e maneho di e gobierno ta. Obviamente esaki ta loke e siguidornan di e diferente partidonan ta spera di nan lidernan politico, pero loke ta cuestionabel ta e forma y nivel cu e discusionnan aki ta tuma lugar. Si sigui asina, e pueblo lo cuminsa perde mas interes y confiansa den e forma cu politica ta wordo hiba, y mas pio ainda Aruba lo perde aun mas e autonomia cu a wordo logra cu sodo di frenta, pasobra Hulanda lo gustosamente “grijp in” manera a tuma lugar. Tin un dicho hulandes cu ta apropia pa e situacion actual: “waar twee honden vechten om een been, gaat de derde er mee heen”.

Mester enfoca riba un UNION nacional na unda e interes di e pais ta bin na prome lugar, na unda lo trata conhuntamente di enfrenta e crisis economico actual, na unda lo mara e man di e politico a base di reglanan di bon gobernacion.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, 7 januari, 2015

Expresionnan haci den e articulo aki no necesariamente ta refleha opinion di ArenaPoliti.co