{idkey=9603b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4085-guillfred-besaril-mep-movimiento-electoral-di-pueblo-tin-un-master-plan-pa-husticia%3FItemid%3D101][title=Guillfred+Besaril+%28MEP%29%3A+%26quot%3BMovimiento+Electoral+di+Pueblo+tin+un+Master+Plan+pa+Husticia%26quot%3B][desc=Ya+cu+nos+tin+un+mandatario+di+husticia+cu+no+ta+comprende+e+contenido+di+su+tarea.%26amp%3Bnbsp%3B%26quot%3BYa+pa+mas+di+seis+luna+mi+ta+bin+ta+elabora+den+li%C3%B1a+grandi+riba+e+contenido+di+e+Master+Plan+di+partido+MEP+pa+loke+ta+trata+husticia+na+Aruba.+Lamentablemente+prome+cu+mi+bolbe+elabora+riba+e+plan%2C+mi+mester+bay+bek+un+poco+mas+prome+cu+e+seis+luna+aki.+Mi+kier+a+probecha+na+recorda+Pueblo+cu+tanto+na+december+di+2015+como+na+januari+di+2016%2C+Movimiento+Electoral+di+Pueblo+a+bin+padilanti+por+medio+di+mo]}
Ya cu nos tin un mandatario di husticia cu no ta comprende e contenido di su tarea. 

"Ya pa mas di seis luna mi ta bin ta elabora den liña grandi riba e contenido di e Master Plan di partido MEP pa loke ta trata husticia na Aruba. Lamentablemente prome cu mi bolbe elabora riba e plan, mi mester bay bek un poco mas prome cu e seis luna aki. Mi kier a probecha na recorda Pueblo cu tanto na december di 2015 como na januari di 2016, Movimiento Electoral di Pueblo a bin padilanti por medio di mocionan di desconfiansa y a anuncia cu Aruba tin un mandatario di husticia cu no ta comprende e contenido di su tarea.

Nos fraccion a trek un liña, "Te aki nos a yega!" Nos no tin confianza cu e Minister actual di Husticia por cumpli cu Pueblo. Na varios ocacion mi a menciona na nomber di Movimiento Electoral di Pueblo cu e no ta algo personal, pero e ta netamente e resultado di su trabou despues di siete aña den gobernacion caminda e no tabata sa di convivi y no a sa di duna Pueblo loke nan ta bin ta sclama pe desde cu partido AVP a asumi gobernacion na aña 2009. 

Na varios ocacion nos a elabora den ki direccion nos mester bai riba e pida baranca aki pa por garantisa Pueblo su trankilidad. Lamentablemente, sea pa motibo di orguyo of terquedad, nunca nos recomendacionan a ricibi oido alguno, te na e punto di a cuminsa costa bida di hende den nan propio hogar.

Movimiento Electoral di Pueblo tin un Master Plan pa Husticia.

PROTECCION DI NOS FRONTERANAN:
Pa basta tempo caba, nos ta bin ta bisa cu mester redefini e tareanan di e departamento di Warda Nos Costa. Mester proteha nos costanan por medio di vigilancia continuo. Ademas, si e radarnan di Kustwacht cu ta staciona na Corsow no ta brinda e servicio cu nos Pueblo exigi, e ora nos mester bin bek cu e sistema di radar local. Mester haci un evaluacion di e procesonan existente pa mehora esakinan a corto, mediano y largo plazo.

BIN BEK CU E SERVICIO DI HELICOPTER:
MEP contrario na AVP, si ta kere cu e trabou cu e helicopter a eherce y e sosten cu e la brinda den diferente area ademas di combatimento di criminalidad y husticia. Un ehempel di esaki ta ora cu turistanan perde of accidenta costanan panort di nos Isla caminda ambulance no por a yega, e helicopter por a yega pa duna e assistencia necesario. Nos ta convenci cu e proyecto di helicopter mester bin bek y si AVP no bin bek cune, mane cu MEP ta na mando otro aña, nos lo bin cune!

POLISNAN DI BARIO:
E proyecto Polis di Bario no a duna e resultado cu Pueblo kier a mira. Pero na e momentonan aki nos comunidad kier mira mas blauw riba caya pa proteha cada bario. Mester redefini e tareanan y funcionamento di Polis di Bario. Por ehempel pone Polis di Bario funciona como un post caminda ta sali patruyanan cu na final ta un sosten pa e personal di e wardanan grandi di e diferente districtonan.

PROYECTO BOTON DI PANICO:
Esaki ta un proyecto cu mi a mira di serca na Buenos Aires, Argentina, caminda ta ehecutando e proyecto aki cu acohida grandi. E "Boton di Panico" ta un aparato parecido na un pager cu un solo boton. Y e servicio por wordo duna hasta den forma di un aplicacion cu por wordo download via "Smart Phones" tipo iPhone of Samsung. Cu un solo primi di boton e ciudadanonan ta ricibi ayudo y/of asistencia di 911, sea di Polis of Ambulance. "Boton di Panico" ta un instrumento cu lo por duna nos grandinan,  comerciantenan local of esnan cu mester di mas proteccion e ayudo of servicio cu nan tin mester na un forma mas rapido y eficiente. "Boton di Panico" lo por ta un instrumento importante na yuda nos comunidad na recobra e sentido di trankilidad.

REENFORSA DEPARTAMENTONAN SOCIAL:
Departamentonan of institucionan mane Reclassering mester ricibi atencion inmediato. No mucho tempo pasa Reclassering tabatin un proyecto pa reintegra hobennan cu a bay den mal caminda bek den nos sociedad. Sinembargo pa falta di fondo, e proyecto a wordo descontinua. Esaki no ta manera pa nos trata nos partnernan social hudicial.

INSTITUI UN DEPARTAMENTO CONTROL DI CALIDAD HUSTICIA:
Un departamento pa "Control di Calidad Husticia" ta altamente necesario pa keda monitor loke ta biba den Pueblo. E departamento aki lo tin e tarea di ta e wowo y oreanan pa full e cadena hudicial na Aruba. Por medio di nan tarea nos lo tin un miho idea kiko Pueblo kier pa nan por trankil y sintinan safe.  

Den e master plan di partido MEP pa husticia, tin mas puntonan riba cuanan mi lo bay ta elaborando den e proximo dianan. Esakinan ta djies un algun cu ya mi a cuminsa elabora riba nan.
Partido MEP lo no descansa den su intento na duna Pueblo su trankilidad bek. Na varios ocacion nos a purba den Parlamento, pero semper nos a wordo chercha pa nos opositornan politico, muy apesar di e disgusto di parti di comunidad.

Pero esaki lo no demotiva ni ami mucho menos partido MEP den e intento na reestablece ordo y trankilidad na Aruba. Ami y definitivamente Pueblo ta nenga na sigui den e situacion actual!" E Parlamentario a termina.

Expresionnan haci den e articulo aki no necesariamente ta refleha opinion di ArenaPoliti.co