{idkey=2983b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4118-gabinete-me-ii-ley-di-effectenverkeer-aproba-den-parlamento-unanimamente%3FItemid%3D101][title=Gabinete+ME+II%3A+Ley+di+%E2%80%98effectenverkeer%E2%80%99+aproba+den+parlamento+unanimamente][desc=ORANJESTAD+-+Siman+pasa+a+trata+e+concepto+di+ley+di+%E2%80%98effectenverkeer%E2%80%99+den+Parlamento%2C+cu+na+mes+momento+a+keda+aproba+unanimamente.+Segun+Minister+di+Finanzas%2C+Angel+Bermudez%2C+e+ley+aki+ta+di+embergadura+basta+grandi%2C+pues+e+ta+consisti+di+126+articulo.E+mandatario+ta+splica+cu+e+meta+di+e+ley+aki+ta+pa+introduci+un+sistema+di+licencia+pa+tur+esunnan+cu+kier+traha+den+e+mercado+financiero+pa+loke+ta+trata+balor%2C+sea+bende%2C+cumpra%2C+intermedia+of+esunnan+cu+kier+trece+bolsa+di+balor.+Na+mes+m]}
ORANJESTAD - Siman pasa a trata e concepto di ley di ‘effectenverkeer’ den Parlamento, cu na mes momento a keda aproba unanimamente. Segun Minister di Finanzas, Angel Bermudez, e ley aki ta di embergadura basta grandi, pues e ta consisti di 126 articulo.

E mandatario ta splica cu e meta di e ley aki ta pa introduci un sistema di licencia pa tur esunnan cu kier traha den e mercado financiero pa loke ta trata balor, sea bende, cumpra, intermedia of esunnan cu kier trece bolsa di balor. Na mes momento e sistema di licencia ta duna Banco Central e autoridad supervisa e mercado y tur e actividadnan cu esaki ta encera.

“E ley aki ta sumamente importante y e hecho cu e la wordo aproba, ta un otro cumplimento cu nos ta realisa pa loke ta trata e exigencianan di FATF y asina nos ta keda riba e bon ruta pa e evaluacion local den e proximo añanan”, asina Minister Bermudez a sigura.

Den pasado tabata tin incidentenan, manera e caso di Stanford Bank, unda cu un grupo grandi di Arubiano keda defrauda pa e banco y hopi hende a nan perde placa. Segun e Minister Bermudez e ley aki precisamente ta evita cu tipo di situacion asina bolbe sosode riba nos isla. “Esaki ta e tipo di incidentenan cu nos kier evita y cu ta pone cu awe pa dilanti e actividadnan aki unda cu ta wordo ofreci interes halto pa e tipo di ahoronan aki lo cay bou supervision di Banco Central”.

Na mes momento e mandatario ta splica cu e ley aki ta forma un base legal pa futuro actividadnan nobo den tereno financiero. Pues asina cu bin novedad pa cu financiamento por ehempel un “crowd funding” of via otro forma unda cu bo ta ofrece papelnan di balor na publico pa despues bo haya e capital pa financia cierto actividad comercial.

Na momento cu novedadnan aki tuma luga cu ta trece hopi inversion tambe cu n’e, e ley aki ta vigente caba y esaki no solamente ta garantisa cu e actividadnan aki por ta bon vigila y cu nan tin e supervision adecua, pero e consumidor tambe ta keda proteha di un manera sigur unda cu e por haya un sentimento cu su inversion ta wordo cuida y supervisa.

Minister Bermudez ta sumamente satisfecho cu e ley aki a keda aproba unanimamente den parlamento pero tambe cu di e forma aki ta sigui cumpli cu exigencianan di FATF. “Mientras tanto nos ta sigui traha riba e otro adaptacionnan di leynan existente cu tambe ta hopi importante y necesario”, e mandatario a bisa.

Expresionnan haci den e articulo aki no necesariamente ta refleha opinion di ArenaPoliti.co