{idkey=2786b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4119-gabinete-me-ii-mfa-sta-cruz-ta-cuminsa-construccion-den-luna-di-november%3FItemid%3D101][title=Gabinete+ME+II%3A+MFA+Sta.+Cruz+ta+cuminsa+construccion+den+luna+di+november][desc=ORANJESTAD+%E2%80%93+E+di+cuatro+facilidad+multifuncional+%28MFA%29+na+Aruba%2C+situa+na+Sta+Cruz+ta+bay+destaho+publico+den+luna+di+October.+Di+e+forma+aki+e+habitantenan+di+Sta+Cruz+y+bisindario+por+spera+cu+den+un+a%C3%B1a+di+tempo+e+edificio+ta+keda+cla+y+ta+bay+ofrece+servicio+di+varios+departamento+y+instancianan+di+gobierno%2C+incluyendo+hulpbestuurskantoor+cu+tambe+ta+bay+ta+un+parti+integral+di+e+facilidad+moderno.+Edificionan+multifuncional+MFA+ta+un+proyecto+di+Gabinete+Mike+Eman+pa+eleva+e+servicionan]}
ORANJESTAD – E di cuatro facilidad multifuncional (MFA) na Aruba, situa na Sta Cruz ta bay destaho publico den luna di October. Di e forma aki e habitantenan di Sta Cruz y bisindario por spera cu den un aña di tempo e edificio ta keda cla y ta bay ofrece servicio di varios departamento y instancianan di gobierno, incluyendo hulpbestuurskantoor cu tambe ta bay ta un parti integral di e facilidad moderno. Edificionan multifuncional MFA ta un proyecto di Gabinete Mike Eman pa eleva e servicionan di gobierno den e diferente districtonan di Aruba.

Servicio mas cerca di comunidad y un area unda habitantenan por socialisa, ta e pensamento principal tras di edificionan multifuncional. Na momento cu e idea aki a keda presenta den Gobierno, a dicidi tambe cu lo scoge un arkitecto of ingeniero di e bario pa presenta un diseño cu ta cuadra cu e deseo di e habitantenan. Den e caso di Sta Cruz, a pone esaki den man di ing. Ghisberto Figaroa di Bouwtechnisch Adviesbureau Atzpro N.V. Ing. Figaroa a prepara e proyecto di e facilidad multifuncional di Sta Cruz, cu ta wordo construi un poco pazuid di oficina di rijbewijs.

Gobierno a consulta cu habitantenan di e bario kico nan kier mira den e diseño di e edificio como parti di e fase di planning. Asina por ehempel Figaroa a splica, cu e habintantenan a mustra cu bandera di Aruba ta algo cu nan kier mira bek den e diseño. E diseño tin bandera di Aruba presenta den “natuurstenen”, ariba na entrada di e edificio. Despues ta haya e bandera un biaha mas den glas unda a percura pa tin e colornan oficial. “E ta den loodglas y ora cu solo dal riba dje, e ta keda ilumina den e edificio,” Figaroa a splica, agregando cu e ta priminti di bira un bista bunita.

E diseño ta encera cu den e parti patras tin un amfitheater multifuncional. Den e espacio aki por organisa diferente tipo di evento y e ta pega riba un sala multifuncional cu tin portanan grandi. Nan por wordo habri y asina ta crea un espacio hopi mas grandi. E arkitecto a sigui splica cu den e parti dilanti di e edificio tin un espacio pa biblioteca, un area pa duna curso y pa tene reunion. Na banda drechi di e edificio tin e espacio reserva pa Oficina Auxiliar di Gobierno (hulpbestuurskantoor), cu ta e oficina principal den e edificio.

Mescos cu den e otro facilidadnan multifuncional, tin areanan reserva pa otro departamentonan cu kier brinda nan servicio den e bario. Asina por ehempel na di dos piso di e diseño pa MFA Sta Cruz tin espacio pa por lo menos 4 area cu por wordo uza door di diferente departamento di Gobierno.

Inspiracion den e diseño ta cu a enfoca loke habitantenan di Sta Cruz ta desea, manera e amfitheater patras cu ta un referencia na Ser’i Noka. Den e area aki gruponan por duna presentacion na e pueblo di Sta Cruz. Como cu na entrada ta uzando piedra natural pa diseña e bandera, cu ta corta den e piedra, no ta bay haci uzo di e colornan. Solamente e forma di bandera y loke ta aparece riba dje por wordo mira den e piedra. E diseño ta inclui espacio di parkeo pa mas o menos 35 auto.

Expresionnan haci den e articulo aki no necesariamente ta refleha opinion di ArenaPoliti.co