{idkey=643b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4293-booshi-wever-upp-parlamento-no-ta-compronde-cu-nombracion-di-sr-boekhoudt-como-gobernador-ta-otro-prueba-con-gobierno-hulandes-ta-sigui-mina-aruba-su-autonomia%3FItemid%3D101][title=Booshi+Wever+%28UPP%29%3A+Parlamento+no+ta+compronde+cu+nombracion+di+sr.+Boekhoudt+como+Gobernador%2C+ta+otro+prueba+con+Gobierno+Hulandes+ta+sigui+mina+Aruba+su+autonomia][desc=Cu+sentimentonan+mixto+partido+UPP+a+tuma+nota+di+e+decision+di+Gobierno+di+Reino+diabierna+ultimo%26amp%3Bnbsp%3Bcu+a+wordo%26amp%3Bnbsp%3Bratifica+despues%26amp%3Bnbsp%3Bdor+di+Rey+Willem+Alexander+diamars+ultimo%2C+encuanto%26amp%3Bnbsp%3Bnombracion+di+un+Gobernador+nobo+pa+Aruba.+Pakico+cu+sentimentonan+mixto%3F+Pasobra+un+biaha+mas+nos+por+mira+con+Hulanda%2C+apesar+cu+Minister+Presidente+Mike+Eman+ta+e+culpabel+mayor%2C+ta+tribi+di+mina+nos+autonomia+dor+di+%E2%80%9Cby+pass%E2%80%9D+Aruba+y+no+hiba+por+lo+menos+un+deliberacion+cu+tanto+gobierno+di+]}Cu sentimentonan mixto partido UPP a tuma nota di e decision di Gobierno di Reino diabierna ultimo cu a wordo ratifica despues dor di Rey Willem Alexander diamars ultimo, encuanto nombracion di un Gobernador nobo pa Aruba. Pakico cu sentimentonan mixto? Pasobra un biaha mas nos por mira con Hulanda, apesar cu Minister Presidente Mike Eman ta e culpabel mayor, ta tribi di mina nos autonomia dor di “by pass” Aruba y no hiba por lo menos un deliberacion cu tanto gobierno di Aruba como cu Parlamento di Aruba, ariba e asunto aki, manera a sosode cu nombracion di tur tres gobernadornan di Aruba despues di 1986. 
UPP por comprende cu e lista di sr. Mike Eman, no ta e mihor lista y no ta cuadra cu kizas e profiel cu Hulanda ta pone, pero toch UPP ta kere cu si gobierno di Hulanda ta respeta Aruba un tiki, lo mester por a delibera riba e impasse aki.
Apesar cu UPP ta pensa cu tin mas tras di asunto aki y cu ta Minister Presidente di Aruba mester duna claridad, e silencio di gobierno di Aruba y lider di e pais aki, esta sr. Mike Eman, ta muestra di un posicion ambivalente di dje. E silencio di un banda ta parce cu gobierno di Aruba lo no ta di acuerdo cu e nombracion aki, pero na mesun momento ta guli manda abou atrobe loke Hulanda ta impone. 

UPP kier ta bon cla cu, compara cu otro partidonan, nos no ta di hubilo pasobra Hulanda a pasa Aruba of sr. Mike Eman un fastball. Nos no tin nada contra sr. Boekhoudt y nos ta desea su persona tur clase di forza, sabiduria, firmeza y exito pa e posicion cu e ta bay carga awor. Y nos ta spera cu na momento cu ta rekeri esaki, demonstra e caracter manera Gobernador saliente, sr. Freddis Refunjol a demostra na varios ocasion. Pues nos ta spera cu e no bira un " speelbal" ni di Hulanda y mucho menos di e gobierno actual, cu a permiti Hulanda kita kizas no un autoridad, pero si un previlegio deriva di e autonomia, respet mutuo, cu nos tin den Reino Hulandes.
Te cu algun luna pasa sr. Mike Eman tabata bon pa Hulanda pa a campaña pa un asiento den United Nations su conseho di seguridad. Pa tur e pendeldienst cu sr. Eman tabata haci, gobierno di Hulanda no tabata tin sikiera e aprecio pa por a regla e asunto aki mas nechi?

Of atrobe sr. Eman ta pensa di desvia atencion di e menosprecio demonstra door di Hulanda y bay hunga un wega di martir pa bolbe haya simpatia den pueblo? Of sr. Eman mes ta tras di e nombracion aki como recompensa pa "fabor" cu e futuro gobernador a hasi tanto Henny como Mike Eman tempo cu e tabata traha na Interbank??
Algo hopi peculiar den henter e asunto aki ta cu un biaha mas tin un secrecia rond di e nombracion aki, cu ta bai contra tur regla di Good Governance. Aki Hulanda tambe ta pecando contra esaki. Loke tambe a hala nos atencion ta e hecho cu no UN pero TUR TRES candidatonan di e Mike Eman NO a pasa e screening hasi dor di Hulanda pa e funccion di Gobernador. Un di e candidatonan ta e actual minister di finanzas Bermudez. Si e NO a pasa e screening pa bira Gobernador, ta ken a screen e pa bira minister??  E screening riba nos futuro gobernador ta encera tambe su involvimentonan straño tempo di e proyecto di mudamento di nos waf?

Si encaso cu sr. Eman ta contra di loke a sosode, mirando con constantemente Hulanda ta mete den nos autonomia, anto a yega e momento pa sr. Eman tuma honor na su mes y entrega su retiro. Un biaha mas, como un partido cu su filosofia Betiquista, nos no por aplaudi e decision aki di Hulanda. Nos ta keda cu sentimentonan mixto, mescos tempo cu Gobernador di Aruba a keda sin firma, e presupuesto, ora cu e KB a bini. Mesun sentimento mixto ora cu Hulanda a impone un Caft riba Aruba. Ta ora pa sr. Eman saca su conclusion, cu ta bou di su gobernacion y su maneho, Aruba su autonomia ta kedando na filingrana.


Partido UPP
Booshi Wever
13 oktober 2016

Expresionnan haci den e articulo aki no necesariamente ta refleha opinion di ArenaPoliti.co