{idkey=7208b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4633-rene-herde-avp-prioridad-esnan-den-mas-necesidad%3FItemid%3D101][title=Rene+Herd%C3%A9+%28AVP%29%3A+PRIORIDAD%3A+esnan+den+mas+necesidad][desc=Un+di+e+areanan+di+prioridad+di+maneho+di+gobiernonan+di+AVP%2C+tabata+y+ta+e+maneho+socio-economico.+Esta%2C+e+forma+cu+gobierno+ta+atende+asuntonan+di+forsa+di+compra%2C+reparticion+di+entrada%2C+salario+minimo%2C+costo+di+awa+y+coriente%2C+etc.+E+forma+cu+ta+duna+contenido+na+e+maneho+socio-economico%2C+ta+bisa+hopi+di+e+metanan+principal+cu+un+gobierno+scohe+pa+realisa+y+e+ta+bisa+con+e+ta+haci+pa+realisa+esey.+Un+gobierno+cu+den+su+maneho+socio-economico+ta+duna+prioridad+na+esnan+den+mas+necesidad%2C+obvi]}
Un di e areanan di prioridad di maneho di gobiernonan di AVP, tabata y ta e maneho socio-economico. Esta, e forma cu gobierno ta atende asuntonan di forsa di compra, reparticion di entrada, salario minimo, costo di awa y coriente, etc. E forma cu ta duna contenido na e maneho socio-economico, ta bisa hopi di e metanan principal cu un gobierno scohe pa realisa y e ta bisa con e ta haci pa realisa esey. Un gobierno cu den su maneho socio-economico ta duna prioridad na esnan den mas necesidad, obviamente ta wak cu den adelanto di pais, tur hende mester bay dilanti hunto. Den boca di pueblo, e atencion cu un gobierno ta duna "Buchi Juan" y "Shimaria", ta bisa si un gobierno cu ta wak necesidad y yuda esnan den mas necesidad den pueblo of no. Tin un dicho ta bisa cu un pais y un gobierno ta wordo huzga pa e forma cu e yuda esnan den mas necesidad. 

MAMA SOLTERO CU DOS JIU 
Na Aruba e grupo den mas necesidad ta esnan sin trabou of entrada y cu mester biba di e asistencia social cu Gobierno ta duna. Den e grupo aki e "mama soltera cu dos jiu" a bira un norma of un midi riba su mes. E forsa di compra di un "mama soltero cu dos jiu" a bira e forma cu ta huzga con esnan den mas necesidad ta para, en comparasion cu resto di nos comunidad. Pa gobierno di AVP di gabinete Mike Eman I y II, esaki tambe a bira un forma di midi con esnan den necesidad ta para na un momento of otro. E ta un forma pa midi tambe kico un gobierno of otro a haci pa e grupo di ciudadanonan den necesidad. 
CONTRASTE ENTER MEP Y AVP  
E asistencia cu gobierno di AVP a duna esnan den mas necesidad for di 2009, ta den un contraste grandi compara cu loke nan a haya na entrada bou di gobiernonan di MEP. Despues di 8 aña di gobierno di MEP, e añanan cu MEP mes a yama e "miho añanan di Aruba", e entrada di un "mama soltero cu dos jiu" tabata 655 florin na 2009. Na 2011, mei mei di e crisis na mundo y na Aruba, Gabinete Mike Eman a aumenta e entrada di esnan den mas necesidad na 1157 florin pa luna. A introduci e asistencia pa muchanan di scol y a aumenta tur e otro sumanan di asistencia social cu placa di pueblo. Na 2017 a bolbe aumenta e asistencia aki. Awor na 2016 e entrada di un "mama soltero cu dos jiu" ta 1350 florin pa luna. No tin duda cu tur e critica di cu gabinete Mike Eman a gasta placa y a causa debe ta haya otro cara, ora wak na unda e placa di pueblo ta bay: na nos pais y na esnan den mas necesidad!

Expresionnan haci den e articulo aki no necesariamente ta refleha opinion di ArenaPoliti.co