{idkey=1292b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5257-mep-e-grito-di-baas-den-nos-mes-cas-di-18-di-maart-1948-a-muri-na-october-1949%3FItemid%3D101][title=MEP%3A+E+grito+di+%E2%80%98Baas+den+nos+mes+cas%E2%80%99+di+18+di+maart+1948+a+muri+na+october+1949][desc=Loke+Mike+Eman+no+ta+conta+pueblo%3A%26amp%3Bnbsp%3BA+bira+un+custumber+caba+cu+asina+yega+luna+di+maart%2C+esta+luna+pa+nos+recorda+e+Conferencia+di+Mesa+Rondo+1983%2C+luna+di+himno%2C+bandera+y+tambe+referendum+%E2%80%93+Mike+Eman+ta+sali+dilanti+pa+duna+su+propio+interpretacion+na+e+celebracion+di+nos+Dia+di+Himno+y+Bandera.+Hecho+ta+cu+cada+biaha+e+fulan+aki+kier+keda+plak+e+fecha+di+18+di+maart+na+e+logro+di+Status+Aparte+y+awor+e+kier+bay+honra+e+2147+firmantenan%2C+pero+e+no+ta+conta+di+e+traicion+cu+a+ser+cometi+]}
Loke Mike Eman no ta conta pueblo: 

A bira un custumber caba cu asina yega luna di maart, esta luna pa nos recorda e Conferencia di Mesa Rondo 1983, luna di himno, bandera y tambe referendum – Mike Eman ta sali dilanti pa duna su propio interpretacion na e celebracion di nos Dia di Himno y Bandera. Hecho ta cu cada biaha e fulan aki kier keda plak e fecha di 18 di maart na e logro di Status Aparte y awor e kier bay honra e 2147 firmantenan, pero e no ta conta di e traicion cu a ser cometi contra nan door di  su propio partido. Ta p’esey mes nos di MEP ta haya nos obliga pa trece e historia den e version corecto pa pueblo mes por mira con Mike Eman kier sigui manipula cu e logro di lucha pa nos Status Aparte. 

Discriminacion di AVP 
Na aña 1947 partido AVP a colecta firma na Aruba pa sostene e lucha pa Separacion for di Antiyas. Un gran cantidad di ciudadano a kere cu sigur e politiconan cu a pidi nan firma lo para fuerte bao tur circumstancia pa e Separacion y prueba di esaki ta cu 2147 persona a firma. Remarcabel tabata e practica di discriminacion ya cu ningun hende muher por a firma, pasobra pa AVP nan no tabata tin derecho. Fuera di esey e lista cu e 2147 firmantenan ta prueba di e politica discriminatorio di AVP contra tur hende cu a bin for di Corsou, Boneiro, Isla Riba, Surinam etc., pasobra no tin ningun fam riba e lista cu ta duna indicacion cu e hendenan aki tambe tin derecho. Ta p’esey mes na e Monumento di traicion 12-8 no ta aparece ningun fam manera Hooijboer, Winklaar, de Meza, Dowers, Varlack, Sneek, de Sousa, Velasquez, Dammers, Daquin etc. Si esaki no ta discriminacion, anto con otro mester yama esaki anto? 

Baas den nos mes cas 
Dia 18 Maart 1948 Shon A Eman a entrega na Reina Wilhelmina e peticion cu e 2147 firmanan pa mas autonomia pa Aruba, e asina yama ‘Baas den nos mes cas.’ Alavez a ser acepta pa studia e deseo di Aruba pa tin un posicion special den Reino Hulandes y a nombra un comision pa cu esaki. Durante e eleccion di 1948 AVP a core campaña a base di e peticion aki y nan a logra haña 5 asiento y partido UNA 3. Na mei 1948 Aruba a haya igualdad (8-8) cu Corsou na momento di cambio di e Staatsregeling. Den formacion di e gobierno di e tempo ey e lider di NVP di Corsou, esta Da Costa Gomez, no tabata contento cu Corsou siendo mas grandi cu Aruba tin e mesun cantidad di asiento den Staten cu tabata 8. Door di discusion ey Hulanda a manda Prof. van Poelje pa Antiyas pa regla e asunto aki.

Interimregeling versus Plan di Poelje 
Prof. van Poelje a bin cu dos concepto di ley. Un tabata yama Interim Regeling y e otro Plan van Poelje. E diferencia di nan dos ta cu Plan van Poelje ta regarda cu cada isla ta dicidi pa su mes cual departamentonan di gobierno lo kier traha hunto cu otro, mientras cu Interim Regeling tabata papia di e isla cu mas voto ta haya mas asiento. Henny Eman tabata inclina pa e deseo di Da Costa Gomez cu tabata kier e Interim Regeling. Na mei 1949 AVP a forma un gobierno cu NVP y Shon A Eman, tata di e actual PM a haya un puesto di ministro sin cartera.

Traicion di AVP 
Dia 13 di october 1949 den Staten di Antiyas tres miembro di AVP a vota hunto cu Da Costa Gomez pa e Interim Regeling, mientras cu Juancho Yrausquin, Fichi Croes y partido UNA cu tabata kier e Plan van Poelje a vota contra. E tempo ey un Arubiano, Juan Eusebio Croes cu a firma pa Separacion y cu a sinti cu nan tur a ser traiciona como forma di protesta durante e reunion den Staten a tira Henny Eman cu webo. Resultado di e traicion di AVP tabata cu Hulanda a duna Corsou 12 asiento y Aruba a keda cu 8 asiento. Cu e votacion aki AVP a vota contra pa Aruba por a haya mas autonomia y a traiciona e 2147 firmantenan. Di su regreso na Aruba, Henny Eman a tuma henter pueblo haci spektakel bisando cu “Aruba no a perde nada, pero ta Corsou a haya 12”.

E cadena di 12-8 a bira realidad
Na mei 1950 Tweede Kamer a acepta e Interim Regeling cu e cambio di e 8-8. Pues esaki a bira 12-8. E tempo ey AVP no a reacciona y no a protesta, al contrario a bin fiesta na Aruba, pero pueblo Arubano si no a keda contento. Na Augustus 1950 e Interim Regeling a ser trata den Eerste Kamer, unda e partidonan politico UNA y PPA a pidi pa rechaza e “Interimregeling”. Enbez cu AVP a sostene UNA y PPA, nan a keda keto, pasobra ya nan mes a acepta e areglo aki pa hinca Aruba bao di Antiyas. Cu e votacion tanto den Tweede Kamer como Eerste Kamer e humiliacion di 12-8 a bira realidad. Pues e hecho cu Mike Eman ta bisa awe cu Status Aparte a wordo logra dia 18 Maart 1948 ta un mentira flagrante. Eynan e grito a nace pa ta ‘Baas den nos mes cas’ y e grito ey ya a muri na october 1949 ora cu Henny Eman y dos mas den AVP a vota cu Da Costa Gomez pa Interim Regeling, traicionando asina e 2147 firmantenan. Hecho ta cu  pueblo Arubano mester a warda dos decada mas pa porfin Aruba por a haya e berdadero luchador pa nos autonomia, nos Status Aparte, esta e gran estadista Betico Croes    (E ta sigui).

Expresionnan haci den e articulo aki no necesariamente ta refleha opinion di ArenaPoliti.co