{idkey=8101b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5405-upp-upp-ta-urgi-na-camara-di-comercio-pa-reconsidera-e-participacion-na-debate-electoral-2017%3FItemid%3D101][title=UPP%3A+UPP+ta+urgi+na+Camara+di+Comercio+pa+reconsidera+e+participacion+na+debate+electoral+2017][desc=UPP+diamars+atardi%2C+despues+di+a+tuma+nota%2C+cu+pa+e+debate+2017+partidonan+AVP%2C+MEP+y+POR+ta+esnan+cu+lo+a+haya+un+participacion+automatico%2C+comokiera+cu+nan+tin+representacion+den+parlamento%2C+a+manda+un+carta+di+protesta%2C+urgiendo+pa+laga+e+sentido+democratico+prevalece+y+duna+tur+partido+un+un+participacion+na+e+debate+aki.+Manera+cu+entre+tanto+ta+conoci%2C+cu+e+debate+organisa+pa+Camara+di+Comercio+ta+duna+oportunidad+na+3+partido+mas+pa+bin+acerca.+Y+esaki+lo+bira+un+escoho+por+medio+di+un+en]}
UPP diamars atardi, despues di a tuma nota, cu pa e debate 2017 partidonan AVP, MEP y POR ta esnan cu lo a haya un participacion automatico, comokiera cu nan tin representacion den parlamento, a manda un carta di protesta, urgiendo pa laga e sentido democratico prevalece y duna tur partido un un participacion na e debate aki. Manera cu entre tanto ta conoci, cu e debate organisa pa Camara di Comercio ta duna oportunidad na 3 partido mas pa bin acerca. Y esaki lo bira un escoho por medio di un encuesta online. Partidonan cu kier participa tanto na e debate y como na e encuesta mester a entrega pa 31 di maart tanto un copia di nan statutonan, como di nan programa. 

UPP den su carta a protesta contra e echo cu no ta duna tur partido participacion. UPP a mustra cu,  como un partido social-democrata, desde su fundacion ta para pa e.o. bon gobernacion y un proceso democratico habri y transparente. Un proceso caminda un y tur mester tin e oportunidad pa participa na e proceso di informacion na caminda pa eleccion.

UPP a protesta tambe contra e hecho, cu tanto partido AVP como partido POR no a cumpli cu e rekesitonan di entrega di alomenos un programa di partido pa eleccion venidero. Partidonan si cu a cumpli ta MEP, PPA, ABO, RED, MAS y UPP. Segun destila for di informacion di Camara di Comercio, POR ta wordo reconoci como un partido cu representacion den parlamento, y como tal automaticamente ta participa na e debate proximo. UPP a mustra Camara di Comercio, cu na 2013, na momento cu nos partido tabata existi, Camara di Comercio, organisando e Debate 2013, a uza como punto di salida cu ta organisacionnan politico, representa den Parlamento so por participa na e debate y cu UPP no ta forma parti di Parlamento. Nos di UPP a mustra cu su lider Booshi Wever na e momentonan ey tabata representa UPP den parlamento. Pero Camara di Comercio a argumenta cu Booshi Wever ta un miembro independiente y cu UPP no ta den parlamento.  E tempo ey, respetando e punto di salida di Camara di Comercio, nos a vocifera nos opinion cu lo ta mas na su lugar pa laga tur partido politico cu ta participa na eleccion, forma parti di e debate. Pero esaki no a wordo tuma na consideracion. 

Sinembargo awe nos ta mira, apesar cu Camara di Comercio a cambia e concepto, cu nos Parlamento cu defacto tin dos independiente, si ta haya e reconocimento pa ta den representacion di e partido nobo POR, cu ainda no participa na ningun eleccion.Tampoco no a entrega ni su statutonan, ni un programa di partido sikiera den concepto. Loke nos por comprende cu aparentemente ainda e partido no ta cla cu Electorale Raad. Den nos carta nos a pidi Camara di Comercio pa duna un hustificacion di esaki.
Es mas, e organisacion politico PDR, a wordo exclui completo. Nos pregunta ta kico ta sosode na momento cu juez dicta sentencia cu e grupo Alonso Tromp ta esnan cu ta e PDR legitimo? Defacto bo ta bay haya 2 parlamentario independiente den parlamento, cu a afilia nan mes na un partido nobo cu nunca no a participa na eleccion.

Apesar di esaki partido UPP a dicidi di cumpli cu e rekisitonan pa por participa na e encuesta online.
Loke awor ta resulta cu e encuesta online ta manipulabel na diferente manera. Esaki ta haci cu un persona por vota hala di biaha. Y den oranan di diamars anochi nos por a experiencia esaki.
Riba nos facebook page UPP a pone un video e.o. mustrando con esaki ta posibel. Tambe nos a trata di drenta den communicacion cu directiva di Camara di Comercio pa por atende directamente cu e asunto aki. Pero esaki tabata enbano.  Si UPP a tuma nota entre tanto e encuesta ta saca for di aire, pa motibonan tecnico.

Partido UPP, como un partido cu ta promove transparencia como un parti hopi esencial di nos estado di derecho y pa Bon Gobernacion, a y ta urgi pa Camara di Comercio cumpli realmente cu e sentido democratico y permiti tur partido cu lo participa na e siguiente eleccion ta parti di e proceso di informacion aki, pa asina e pueblo votador haci su escoho pa e siguiente eleccion den un forma mas balanza. Tambe partido UPP ta haci un yamada na nos pueblo, pa den caso cu Camara di Comercio toch mantene na un encuesta online, pa duna UPP e sostene pa ta un di partidonan cu lo ta parti di e debate. Pa esaki por bay riba www.kvk.aw y sigui e parti di poll y ey scohe e opocion pa vota.


Partido UPP

Expresionnan haci den e articulo aki no necesariamente ta refleha opinion di ArenaPoliti.co