{idkey=4816b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5406-elton-lioe-a-tjam-abo-camara-di-comercio-exito-cu-bo-debatenan-rigged%3FItemid%3D101][title=Elton+Lioe-A-Tjam+%28ABO%29%3A+Camara+di+Comercio%2C+exito+cu+bo+debatenan+%E2%80%98Rigged%E2%80%99][desc=Ta+e+grupito+privilegia+cu+nan+dealnan+%E2%80%98Sneaky+y+Scondi%E2%80%99%2C+nan+proyectonan+%E2%80%98Nos+cu+Nos%E2%80%99%2C+%E2%80%98Friends+and+Family%E2%80%99+y+%E2%80%98Awor+ta+nos+beurt+pa+horta%E2%80%99%2C+a+trece+Aruba+den+e+abismo+financiero+y+decadencia+social+y+moral+cu+e+ta+actualmente+aden.+Ta+e+clase+aki%2C+a+permiti+cu+awendia+Aruba+tin+solamente+trabou+di+%E2%80%98Cheap+Labor%E2%80%99%2C+un+frontera+hancho+habri%2C+scarsedad+di+tereno%2C+criminalidad+halto%2C+politiconan+miyonario+y+cu+corupcion+den+gobernacion+a+bira+algo+normal.+Tambe+e+asunto+di+%E2%80%98vota]}
Ta e grupito privilegia cu nan dealnan ‘Sneaky y Scondi’, nan proyectonan ‘Nos cu Nos’, ‘Friends and Family’ y ‘Awor ta nos beurt pa horta’, a trece Aruba den e abismo financiero y decadencia social y moral cu e ta actualmente aden. Ta e clase aki, a permiti cu awendia Aruba tin solamente trabou di ‘Cheap Labor’, un frontera hancho habri, scarsedad di tereno, criminalidad halto, politiconan miyonario y cu corupcion den gobernacion a bira algo normal. Tambe e asunto di ‘vota pa cos’, a conduci cu awe e Arubiano ta casi un minoria riba su propio isla, y cu ta wordo menosprecia pa e politico tradicional cu tin mas atencion pa e stranhero. Pasobra nan si por compensa e perdida di voto, siendo cu nan lo ta eternamente fiel na esun cu a duna (of bende) nan un permiso, un tereno of un paspoort. 

Awendia hasta el’a bira normal cu si un partido no tin miyones pa campaña y cumpra voto, defacto e no ta conta. Y asina mes un parti di e pueblo y ningun gremio ta tribi di haci e pregunta publico di unda e miyones pa esakinan ta sali y cuanto nan lo costa pueblo na final.

Pa hopi aña, diferente gremio a keda keto y algun hasta a coopera cu e manipulacion politico pa sconde e situacion socioeconomico malo, pa pueblo. Un bon ehempel di esaki ta e participacion den e ‘Dialogo Social’, pa despues algun sali core bisa cu gobierno no ta respeta of tuma nan na serio. Un otro ehempel, ta nan silencio den e proyectonan ‘Black Corridor’, ‘WEB-Hedging’ y ‘CITGO-deal’. Nan silencio y cooperacion tin su origen den e laso intimo y e dependencia cu nan tin cu e clase politico. E relacion simbiotico aki, a pone hopi hende perde confiansa den algun gremio y nos institutonan democratico.

Awor den bida bo tin cu duna un persona of un instancia e oportunidad pa coregi nan eror. Pero ora bo ta mira cu ainda e persona of e instancia ta kere cu pone un poco lipstick y trata di bende esey como un cambio real, anto no tin otro caminda pa pensa cu realmente nan no ta respeta’bo y kier tuma’bo haci. Awendia mas hende ta consciente di e weganan di manipulacion y ta cansa di mira con cierto partido y gremio tradicional ainda kier bende e pueblo un 6 pa un 9. Pero ta eynan ta unda nan ta faya. Pasobra ainda tin hende inteligente, integro, independiente y cu curashi, pa denuncia tur tipo di manipulacionnan y corupcion aki na Aruba.

Camara di Comercio ta organisa dos debate politico, pa ‘di e forma aki pueblo di Aruba por haya mas informacion kico lo ta e plan cu cada partido ta ofrece si nan drenta Parlamento despues di eleccion’. Porcierto un bon iniciativa. Pero unda Camara di Comercio mester mustra su imparcialidad, e ta bolbe mustra claramente su preferencia politico: ‘KvK a stipula pa participacion na e debatenan, ta pone cu partidonan AVP, MEP y POR por pasa pa participa na e debatenan. Mediante di e encuesta lo saca e otro 3 partidonan cu lo participa entre UPP, RED, PPA, MAS y ABO’.

Pa prome, a scoge pa privilegia e partidonan tradicional riba esunnan cu no tin representacion den Staten. E partidonan tradicional tin tur dia tur sorto di medio na nan disposicion, mientras cu esunnan cu no representacion den Staten no tin esaki. Esunnan cu no tin representacion hasta tin biaha ta wordo boicotia activamente pa cierto medionan, pa asina no por cera conoci cu nan plan y ideanan. Awor Camara di Comercio tambe ta obstaculisa e partidonan cu no tin representacion den Staten (of miyones di placa di sponsor),  na un plataforma nacional. Discriminacion politico!

Dos: Camara di Comercio lo invita e tres partidonan sin representacion den Staten cu sali na cabes di su encuesta. Pues Camara di Comercio ta duna claramente un ‘stemadvies’ aki na pueblo. Camara di Comercio no ta bisa pueblo cu su encuesta no ta representativo y ta depende puramente riba kende tin mas fanatico pa clic riba su partido di escogencia. E encuesta di Camara di Comercio ta brinda e posibilidad cu un hende por clic henter dia, pa asina su partido wordo invita. Manipulacion politico!

Tres: Camara di Comercio a scoge pa POR participa directo na e debatenan. Dicon POR ta participa directo sin cu e tambe mester participa na e ‘competencia di clic’, siendo un partido nobo? Plataforma Politico POR ta un alianza cu a wordo lanta fin di aña pasa y cu no ta representa den Staten. Pues dicon otro reglanan ta wordo aplica pa POR? Preferencia politico!

Pa enfatisa cu Camara di Comercio no ta imparcial, den diferente matutino a sali publica: ‘Plataforma Politico POR, RIBA INVITACION di Camara di Comercio a reuni cu e directiva di e instancia aki (Diario y Solo, 3 April 2017 y Bon Dia, 4 April 2017)’. Pues Plataforma Politico POR cu recien a wordo lanta, ta wordo invita pa Camara di Comercio, prome cu tur e otro partidonan. Trato desigual politico!

E postura tuma pa y e forma di actua di Camara di Comercio den e organisacion di e debatenan aki, no ta mustra cu e ta imparcial. Kisas Camara di Comercio a tuma e postura aki, pa via e vinculo of influencia comercial cu algun miembro di e plataforma aki tin cu’ne.

Pa tres aña caba, partido ABO ta conscientisa y informa pueblo riba asuntonan social, e falta di democracia y corupcion structural. Tur esaki ta wordo haci, tur dia, pa hendenan cu si tin Aruba na pecho y no nan interes personal. Durante e tres añanan aki, partido ABO a wordo boicotia pa diferente medio, pero asina mes, a logra pa su mensahenan yega cerca hopi hende. Hasta cerca e politiconan tradicional cu pa 27 aña tabata forma parti di e destruccionnan y entreguismo structural di Aruba y cu awendia ta un AVP-light. Pa medio di e comunicado aki, partido ABO ta anuncia publicamente cu nos no ta interesa pa participa na ningun debate of plataforma anti democratico. Camara di Comercio, exito cu bo debatenan ‘Rigged’.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co