{idkey=1414b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F771-booshi-wever-upp-e-subida-di-e-prijs-di-gasoline-ta-hustifica%3FItemid%3D101][title=Booshi+Wever+%28UPP%29%3A+E+subida+di+e+prijs+di+gasoline+ta+hustifica%3F][desc=Diaranzon+dia+11+di+maart+u.p.+prijs+di+gasoline+a+subi.+Hopi+ta+cuestiona+y+critica+esaki.+Ta+asina+hopi+e+prijs+di+gasoline+a+subi+cu+ta+hustifica+e+aumento+di+15+cen+aki%3F+Te+leu+cu+ami+por+corda%2C+e+procedura+cu+ta+ser+manteni+door+di+Departamento+di+Asuntonan+Economico+ta+uno+di+hopi+a%C3%B1a+caba%2C+na+unda+gobierno+kier+mantene+e+nivel+di+accijnzen+cu+ta+cobra%2C+riba+un+nivel+stabiel.+Esaki+contrario+manera+e+tabata+ser+haci+den+pasado+na+unda+gobierno+tabata+laga+e+accijnzen+fluctua.+Pero+pa+gar]}
Diaranzon dia 11 di maart u.p. prijs di gasoline a subi. Hopi ta cuestiona y critica esaki. Ta asina hopi e prijs di gasoline a subi cu ta hustifica e aumento di 15 cen aki?

Te leu cu ami por corda, e procedura cu ta ser manteni door di Departamento di Asuntonan Economico ta uno di hopi aña caba, na unda gobierno kier mantene e nivel di accijnzen cu ta cobra, riba un nivel stabiel. Esaki contrario manera e tabata ser haci den pasado na unda gobierno tabata laga e accijnzen fluctua. Pero pa garantisa un nivel di entrada bastante stabiel di entrada, gobierno den pasado a opta pa laga e prijs pa e consumido fluctua, manteniendo e nivel di entrada di accijnzen bastante stabiel. Y mi no ta duda cu esnan responsabel pa esaki na dicho departamento, ta haci esaki na un forma transparente.

Mirando e hecho cu ya caba gobierno ta sutando e pueblo cu medida y dia pa dia tur cos ta birando impagabel, nos ta puntra nos mes cu si gobierno no por a haci un gesto den direccion di e pueblo y absorba e cambio den e prijs di petroleo aki. Obviamente gobierno no kier esaki pasobra su prioridad no ta pa alivia e situacion pesimo di nos pueblo, pero nos tur sa cu e gobierno aki su prioridad ta pa complace cu su financistanan di campaña y esnan cu ta wordo super bon paga pa sigui manipula informacion. Ta p’esey no tin espacio financiero pa haci e gesto aki pa e pueblo por hala rosea un poco. Pues aki gobierno un biaha mas a demostra cu e no ta amigo di nos pueblo.

Banda di esaki ta di spera cu e asunto di "hedging" wordo soluciona, y cu esnan cu ta responsabel pa e debacle aki carga nan responsabilidad y tene honor na nan mes y retira.

Segun mi ta compronde, e prijs cu ta ser usa pa Departamento di Asuntonan di Economia, ta wordo suministra door di Valero. E prijs cu Valero ta duna ta di confia? Loke mi por saca afo di e informacionnan cu mi ta haya, ta mustra cu Valero tin un "Stock" basta grandi aki na Aruba cu a ser cumpra caba na e prijs BARATA, y no na e prijs cu ta ser bisa cu a subi masha poco un paar di dia pasa. Pues e gasoline cu e pueblo ta cumprando desde diaranzon pasa, Valero a cumpra na un prijs hopi abow. Pues Valero ta ganando un dineral cu e manipulacion aki.

Y awe a sali den medionan di comunicacion internacional cu e prijs di petroleo a BAHA atrobe. Esaki kiermeen cu dia cu Valero kier cumpra gasoline atrobe pa yena e tankinan aki na Aruba, esaki lo ta na un prijs barata mescos cu esun cu e tin den e tankinan actualmente. E informacion cu mi tin ta cu Valero tin bastante tankinan disponibel pa warda e gasoline barata, ya cu e mes no ta refinando nada. Kiko esaki ta bisa nos? Valero tampoco ta amigo di nos pueblo.

En bez di a simpelmente bisa Departamento di Asuntonan Economico cu nan tin un "Stock" grandi ainda di e gasoline cu nan a cumpra na prijs barata, cu lo nifica cu e prijs por a keda mescos, nan a scohe pa haci como sifuera cu nan a cumpra e gasoline na e prijs djis un tiki mas caro.

Ta di lamenta cu un compania cu a gana biyones caba na Aruba y cu a ricibi regalo di miyones di e gobierno actual, mester haci un acto asina ey.

Tur esakinan por ser evita ora nos compromete nos mes cu nos lo goberna nos pais a base di principionan cu UPP ta para pe, esta "Good Governance". Y e principionan aki lo no conta solamente pa nos gobernantenan, pero e lo conta tambe pa tur companianan cu kier establece akinan. Y si e principionan aki a ser practica, na unda tin e.o. transparencia, Valero no por a manipula cu e informacion aki.

Ta p’esey UPP ta di opinion cu e aumento di e prijs di gasoline di e siman aki NO ta hustifica.

Ta di spera cu al final pueblo lo sa di acepta e pensamento di UPP cu e solucion di nos problemanan gubernamental y stop cu e tipo di abusonan aki, ta door di acepta e principionan di "GOOD GOVERNANCE", pa asina ey mara man di e politiconan cu lo pone un paro na patronahe politico y cu lo stop e abusonan di compania multinacional y compania cu no kier opera a base di e principio di "Good Governance"!!
 

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil,  maart 12, 2015

Expresionnan haci den e articulo aki no necesariamente ta refleha opinion di ArenaPoliti.co