{idkey=1358b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2724-prome-minister-eman-na-aruba-nos-a-demostra-cu-por-tin-diferencia-di-opinion-den-partido-gobierno-y-parlamento%3FItemid%3D101][title=Prome+Minister+Eman%3A+%E2%80%9CNa+Aruba+nos+a+demostra+cu+por+tin+diferencia+di+opinion+den+Partido%2C+Gobierno+y+Parlamento%E2%80%9D][desc=ORANJESTAD+%E2%80%93+Despues+cu+Presupuesto+2016+di+Pais+Aruba+a+wordo+aproba+diaranson+den+oranan+di+madruga+cu+11+voto+na+fabor+y+10+contra%2C+Prome+Minister+Mike+Eman+a+expresa+cu+esaki+ta+muestra+cu+tin+democracia+na+Aruba%2C+den+Gobierno+y+Parlamento.+Algo+cu+nunca+antes+tabata+posibel.+Den+un+declaracion+amplio+cu+e+mandatario+a+duna+na+Canal+90%2C+el+a+papia+di+e+retonan+grandi+cu+su+Gobierno+ta+confrontando%2C+no+solamente+e+lucha+politico%2C+pero+tambe+%26amp%3Bnbsp%3Be+tarea+importante+pa+pone+standardnan+cu+po]}
ORANJESTAD – Despues cu Presupuesto 2016 di Pais Aruba a wordo aproba diaranson den oranan di madruga cu 11 voto na fabor y 10 contra, Prome Minister Mike Eman a expresa cu esaki ta muestra cu tin democracia na Aruba, den Gobierno y Parlamento. Algo cu nunca antes tabata posibel.

Den un declaracion amplio cu e mandatario a duna na Canal 90, el a papia di e retonan grandi cu su Gobierno ta confrontando, no solamente e lucha politico, pero tambe  e tarea importante pa pone standardnan cu por eleva politica den comunidad.

Presupuesto a wordo aproba cu dos voto en contra di miembronan di fraccion di AVP cu ta sostene Gabinete Mike Eman II. “E reunion no a bay sin su retonan y na final el a wordo aproba cu 11 voto na fabor enbes di 13 cu ta e fraccion completo di AVP. Dos miembro a scoge pa diferente motibo pa laga un bos critico resona riba sea maneho of riba e hecho si nos ta alcansa e metanan poni riba e normanan cu e presupuesto mester cumpli cune,” Prome Minister Eman a expresa.

E mandatario a comenta e tema aki bisando cu sigur su deseo tabata cu tur Presupuesto pasa cu e mayoria cu e fraccion tin, pero alabes ta bisa cu esaki no ta prome biaha cu su Gobierno ta pasa den algo asina. Esta cu tin miembro di e fraccion ta bisa cu toch tin puntonan a base di cual nan ta evalua nan voto. Prome Minister Eman a bisa cu e mes a sinti cu votando na fabor di e mocionnan, e miembronan en cuestion ta bisa di ta sostene e partido, gobierno pero riba cierto punto specifico, riba maneho di un of mas Minister, of cifranan di presupuesto tin punto di bista diferente. “Con fastioso cu e por ta, cu no tabatin 13 voto, e tabata otro di e ocasionnan di por mustra cu nos ta un pais y sigur un partido, y un gobierno cu ta wordo dirigi a base di e compromiso di alcansa metanan pa logra Bon Gobernacion y resultado pa pueblo, y un miho calidad di bida pa pueblo. Pero tambe ta realisa cu ta hopi importante pa pone e standardnan cu cual e democracia y e nivel di politica na Aruba por sigui desaroya su mes. Den e contexto ey mi ta kere cu locual a sosode den Parlamento, cu presupuesto a wordo aproba y dos persona a scoge pa tin un opinion diferente, ta keda na nos con pa anda cu esaki. Y distingui entre loke cu a sosode den pasado y e situacion actual unda ta duna e hendenan espacio pa cana nan linea di pensamento  y demostra cu esaki ta posibel. Ta importante pa pueblo mira e momento aki den un sentido positivo pasobra nos a aproba un presupuesto cu ta bay cumpli cu e normanan cu nos a pone, cu un deficit di solamente 2 porciento.”

Finalisando riba e tema Eman a bisa cu e situacion aki tabata un momento nobo den democracia di un partido, un gobierno unda cu ta eleva nan mes riba e estilo di antes di cay den polemica ora cu tin un pensamento diferente. “Nos a demostra esaki unda a resolve e asunto internamente,” refiriendo tambe na e situacion cu a surgi cu Minister Otmar Oduber. El a menciona con e dos miembronan aki a wordo expulsa di nan partido den pasado pasobra nan a vota diferente riba un ley cu nan kier a pasa. E tempo ey como AVP a critica esaki y awor mester keda consecuente den e pensamento cu un persona por tin un opinion diferente, respeta e proceso democratico y brasa e diversificacion di pensamento cu tin tanto den partido como den gobierno. Pero mester corda pa sigui inverti den e coherencia pasobra demasiado diversidad por causa cu no tin un direccion cu tur hende ta cana.

Expresionnan haci den e articulo aki no necesariamente ta refleha opinion di ArenaPoliti.co