{idkey=5066b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4512-rene-herde-avp-nenga-berdad-no-ta-cambia-berdad%3FItemid%3D101][title=Rene+Herd%C3%A9+%28AVP%29%3A+Nenga+berdad+no+ta+cambia+berdad][desc=Rene+Herd%C3%A9+na+MEP.%26amp%3Bnbsp%3BMEP+ta+purba+troce+realidad+pa+purba+kita+nan+mal+fama%21%26amp%3Bnbsp%3B%26amp%3Bnbsp%3B+%26quot%3BPartido+MEP+a+haci%26%23039%3Be+un+custumber+di+nenga+e+berdad+y+hasta+purba+troce+e+realidad.+Pero+cifra+y+raportnan+no+ta+ga%C3%B1a.+Pa+purba+drecha+nan+mal+fama%2C+MEP+no+ta+basila+pa+usa+tur+medio+posibel+pa+logra+esey.+Pero+e+realidad+ta+cu+ni+cuanto+MEP+purba+di+nenga+e+berdad%2C+e+ta+bon+documenta+den+raport+y+cifranan+pa+tur+hende+por+verifica+nan.+Ni+cuanto+MEP+yama+hende+pa+ga%C3%B1ado%2C+esey+no+ta+cambia+e+realidad.]}
Rene Herdé na MEP. 
MEP ta purba troce realidad pa purba kita nan mal fama!  

"Partido MEP a haci'e un custumber di nenga e berdad y hasta purba troce e realidad. Pero cifra y raportnan no ta gaña. Pa purba drecha nan mal fama, MEP no ta basila pa usa tur medio posibel pa logra esey. Pero e realidad ta cu ni cuanto MEP purba di nenga e berdad, e ta bon documenta den raport y cifranan pa tur hende por verifica nan. Ni cuanto MEP yama hende pa gañado, esey no ta cambia e realidad." Asina Rene Herde' di e fraccion di AVP den Parlamento a splica relaciona cu e insistencia di MEP pa troce e berdad den loke nan bisa, scirbi y haci.

PRESUPUESTO
MEP kier broma cu gobiernonan di MEP tabata tin surplusnan riba presupuesto. Pa ilustra esey MEP ta mustra riba e presupuesto di añanan 2003 y 2008. Esaki ta un bon ehempel di mal maneho di MEP y con nan ta purba troce e realidad. For di e resumen di surplus/deficit di gobierno por saca afo cu MEP a drenta gobierno na 2001 y a haya un surplus di 208.2 miyon florin cu gobierno di AVP a laga. Den apenas un aña MEP a gasta esaki y yega na un deficit di 173.9 miyon na 2002. Door di gaña cu nan a hereda un deficit astronomico, MEP a tuma medida y a logra un surplus di 56.6 miyon na 2003. E aña cu tanto nan ta caba cun'e. Pero nan no ta bisa cu ya e aña despues 2004 atrobe gobierno di MEP a crea un deficit di 159.2 miyon. Na 2005 un deficit di 144.2 miyon, 2006 un deficit di 89.4 miyon, 2007 un deficit di 118.1 miyon, 2008 un deficit di 55.2 miyon y 2009 un deficit di 134.8 miyon. Anto MEP ta gaba cu 2008 y 2009 tabata e miho añanan pa Aruba. Esaki ta e resultado di e forma cu MEP a gasta placa di pueblo. Y kico pueblo a haya?

DIFERENCIA
Tin diferente cos cu MEP aparentemente no kier splica. E prome ta e meta di maneho di finansa publico. E meta cu AVP a fiha ta pa yega na un situacion den finansa publico cu ta balansa e entrada y e gastonan den forma structural. Esey ta nifica cu tur aña bo lo tin presupuestonan balansa. No un aña cu un surplus manera na 2001(= ultimo aña di AVP) cu un surplus di 208.2 miyon florin y e aña despues cu un deficit di 173 miyon. Stabilidad y continuidad a largo plazo ta loke AVP kier den finansa publico.

Didos ta e pregunta essencial: kico pueblo ta haya pa e gasto of inversionnan cu gobierno a haci cu placa di pueblo. AVP por mustra cu luho di detaye kico a haci cu e placa cu a haya y fia entre 2010 y 2017. Entre otro e creasion di trabou, e mehorasion extenso di infrastructura di edificionan, scolnan, centronan di ciudad y barionan. AVP por mustra na cen chikito con a usa e placa pa mehora forsa di compra pa trahadornan di gobierno y maestronan di scol cu a bay dilanti cu 5 mil florin pa aña bou e ultimo dos gabinetenan di Mike Eman. Pensionadonan por conta cu nan pensioen ta sigur awor, door di e inversionan y reformanan di gabinete Mike Eman I y II. Trahadornan den sector priva por conta con nan a cuminsa contrui nan pensioen adicional y cu esnan cu entrada mas abou a haya placa di gabinete Mike Eman riba nan salario mensual. Den e 8 añanan di MEP di 2001 pa 2010 pueblo no a wak ni sinti unda nan placa a bay. Alcontrario. Pueblo mester a welga, wanta insulta, medida y amenasa, mientras cu e "friends and family" di MEP a bira mas y mas rico. E raport di WODC ta confirma esaki! MEP kier sigui nenga e berdad. Pero nan no por cambia e berdad! MEP por sigui yama tur esnan cu ta expone e berdad cu preuba pa gañado, esey no ta cambia e realidad. Obviamente MEP tin un problema serio pa papia berdad! 

Expresionnan haci den e articulo aki no necesariamente ta refleha opinion di ArenaPoliti.co