{idkey=5730b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F677-rene-herde-avp-inverti-pa-crece%3FItemid%3D101][title=Rene+Herd%C3%A9+%28AVP%29%3A+Inverti+pa+crece][desc=E+importancia+di+crecemento+economico+ta+incuestionabel.+Un+di+e+factornan+cu+ta+stimula+crecemento+economico+ta+inversion.+Specialmente+inversionnan+den+renobacion+di+sietema+y+organisacion%2C+uso+di+tecnologia+den+trabou+y+up-grading+di+conocemento+y+habilidadnan+di+trahadornan%2C+ta+contribui+na+crecemento+economico+rapido.+E+maneho+aki+a+wordo+proba+bez+tras+bez+den+pasado.+Na+Merca+desempleo+a+baha%2C+productividad+a+crece%2C+exportacion+a+crece%2C+desaroyo+general+ta+sumamente+optimista+despues+di+h]}
E importancia di crecemento economico ta incuestionabel. Un di e factornan cu ta stimula crecemento economico ta inversion. Specialmente inversionnan den renobacion di sietema y organisacion, uso di tecnologia den trabou y up-grading di conocemento y habilidadnan di trahadornan, ta contribui na crecemento economico rapido. E maneho aki a wordo proba bez tras bez den pasado. Na Merca desempleo a baha, productividad a crece, exportacion a crece, desaroyo general ta sumamente optimista despues di hopi aña di preocupacion. E maneho di stimula e economia mas grandi di mundo cu inversionnan financia door di gobierno, a haci cu economia di Merca ta crece atrobe. E confiansa den economia mericano tambe ta bek. Na Europa nos ta wak un desaroyo net contrario. Door di austerisacion severo e inversionnan a cay enormente y door di esey crecemento economico a cay. Pio ainda pasobra e paisnan europeo ta cumpra for di otro, ora tur a bay austerisa y cumpra menos di otro, tur a sinti e efecto negativo. Awor aki den tur pais europeo ta grita pa inversion. Hasta Union Europeo mes a anuncia un programa di inversion di mas cu 300 biyon Euro pa e benidero añanan. Tur esaki pa stimula economia di e paisnan di UE y door di esey crea trabou y mehora e clima economico.

E CASO DI ARUBA
Na Aruba ta e partido AVP so a sigui e maneho di stimula nos economia. Tur otro partido den y pafo di parlamento tabata y ainda kier austerisa pisa, sin wak consecuencia pa nos economia y pa pueblo. Gobierno di AVP a stimula nos economia door di usa placa di caha di gobierno y fia placa pa inverti den proyectonan cu ta mehora nos pais y na mes un momento a crea trabou. Asina a saca nos economia for di e abismo cu e tabata aden apenas 5 aña pasa. Den e raport di IMF cu a sali siman pasa, e desaroyo aki ta wordo describi. IMF ta mustra tambe cu mester sigui inverti y stimula nos economia. E inversion aki no tin cu bin di gobierno so. Sector priva por contribui hopi den esaki tambe. Creasion di fondonan pa hunto inversionistanan local inverti den areanan nobo di nos economia, ta un di e posibilidadnan pa inversionnan nobo.

OPORTUNIDADNAN NOBO
Banda di sigui cu e maneho di laga turismo crece den calidad y no hopi mas den cantidad, AVP ta haya cu mester crea otro oportunidadnan nobo pa inversionnan grandi y chikito. Un di e posibilidadnan mas inovativo y productivo ta e area di energia sostenibel. For di 2010 gobierno di AVP a cuminsa crea e area nobo aki. IMF den su ultimo raport ta referi na e area di inversion aki como uno cu hopi posibilidad. Profesor Vermeend di Hulanda ta conseha gobierno pa inverti mas den e area aki y den resto di economia. Banda di esaki gobierno di AVP lo crea incentivonan nobo pa inversion local y internacional, door di renoba nos sistema di belasting pa haci'e mas atractivo pa inverti den Aruba. Tambe gobierno di AVP lo dedica mas area sumamente atractivo pa inversionnan nobo den diferente tereno. Areanan manera di e waf na Playa cu lo bini disponibel despues di kita tur e edificionan bieuw. E area di Barcadera cu ya ta existi pero cu e waf nobo lo bira mas atractivo. E area unda e refeneria ta awor aki lo por wordo destina pa actividadnan industrial nobo. Y finalmente e areanan banda di e RingWeg nobo cu lo wordo construi. E maneho ta pa haci inversion nobo atractivo door di un clima fiscal nobo y door di destina areanan pa actividadnan nobo. Haciendo esaki gobierno ta stimula inversionnan nobo, pa crea trabou nobo y entrada nobo pa nos pais. Pasobra ta asina Aruba ta crece y nos tur ta bay dilanti.

Expresionnan haci den e articulo aki no necesariamente ta refleha opinion di ArenaPoliti.co